Nú um þessar mundir er verndarinn mikli orðinn leiður á að gæta hinnar viðkvæmu Fjallkonu og hefur tilkynnt brottför þrátt fyrir grátbænir og fögur tár Fjallkonunnar. Okkar hæstvirti Utanríkisráðherra, hann leikur hálft hlutverk Fjallkonunnar á móti Forsetisráðherranum hæstvirtum, var að tala um það í ríkisútvarpinu áðan að slæmt væri að þessi meintu tryggðarsvik hetjunnar á hvíta hestinum blandaðist saman við ofurlitla hnífstungu, eða öllu heldur stungur því þær voru þrjár, er átti sér stað í Hafnarstrætinu fyrr í sumar. Þar var að verki einn af verndurunum og vilja félagar hans fá að rétta yfir honum sjálfir, þar sem vitað er að hetjan er alltaf í rétti þegar hún drepur menn, það var allt nauðvörn. Þetta mál kallaði Utanríkisráðherrann smá mál miðað við mögulega varnarsviptingu eyjunnar.

Nú er mér spurn, og ég spyr bara svona af því að ég er froðufellandi og illa innrættur kommaskratti, hvað með varnir hins almenna borgara fyrir þeim tugum eða hundruðum, ég veit ekki hvað þeir eru margir, þrautþjálfuðu atvinnumorðingjum sem hýrast með alvæpni á Miðnesheiði. Gerið ykkur grein fyrir því hvað við erum í gríðarlegri hættu við það að hafa niðri í bæ um hverja helgi heilu hópana af mönnum sem hafa valið sér það sem ævistarf að slátra öðru fólki, og þá samkvæmt öllum heimildum aðalega almennum borgurum því mannfall er mest úr þeirra hópi í hverju stríði, í þessum skrifuðum orðum eru 7706 almennir borgara fallnir í Íraksstríðinu.

En hafið í huga þegar atvinnumorðingjarnir byrja að misþyrma ykkur niðri í bæ um næstu helgi að þetta er smá mál miðað við öll þau störf sem glatast ef Verndarinn fer.