Jæja, þetta bloggsvæði okkar er farið að ryðga ansi mikið og kannski tímabært að láta eitt stykki blogg vaða svona fyrir Ingibjörgu sem er stödd í landi tréklossa og túlípana um þessar mundir.

Kæra Ingibjörg
Margt hefur breyst á Íslandi síðan þú fórst burtu af landinu. Búið er að flytja allt jarðfræðifólk nauðungarflutningum í stórt og mikið hús í Vatnsmýrinni. Þetta hús hefur fengið nafnið Askja en hefði með réttu átt að heita gluggatjaldalausa Skrímslið í Vatnsmýrinni. Gamla jarðfræðihúsið er óðum að tæmast og bara rétt í morgunn var Siggi Steinþórs að henda fjórða árs verkefninu hans Steingríms J. Sigfússonar í ruslagáminn fyrir utan húsið. Hér hefur líka mikið verið að gerast í þjóðlífinu og Sverrir var t.d. í sjónvarpinu á dögunum þar sem hann mótmælti óprúttnum upptökum skólagjalda við HÍ, já rektor fékk að kenna á því! Sæmundur fróði, Gummi OPAL, Erla Perla og aumingja ég ætlum samkvæmt orðrómi sem birtist í DV á dögunum, ekki að útskrifast fyrr en í haust. Björninn er jafnóútreiknanlegur og oft áður þannig að ég veit ekki með hann. Ég veit ekki heldur með þig Ingibjörg, en þar sem þú ert stödd í vindmyllulandinu þá ætla ég að þú útskrifist bara líka þá. Hinir vitru öldungar Siggi og Dr. Reynisson ætla að útskrifast núna í vor en Fjalar mun síðan halda í víking til Aberdeen í haust (hann ætlar að verða ríkur olíujarðfræðitöffari). Veit ekki hvað Siggi er með á prjónunum í framhaldinu. Þetta er búin að vera lítil fylleríisönn enda allir svo bissí í vísindalegum þönkum og hef ég heyrt að sumir séu endanlega búnir að segja skilið við Bakkus gamla, þannig að holufyllingar hafa verið ósköp sundraðir þetta misserið. En ég ætla ekki að hafa þetta lengra að sinni. Drífðu þig nú svo heim Ingibjörg, en eins og þú veist þá eru jöklarnir að bráðna og það fer hækkandi yfirborð heimshafanna og þá fer Holland bráðum á kaf. Svo eru holufyllingafélagar þínir líka bara farnir að sakna þín svo óskaplega mikið.